Reading Comprehension

On’sogiminrangko poraie sing’anirangna aganchakbo:
Badiaba burung bolgrim damsao makkke aro do’mesal gronggrike rona ine ku’mongaha. Do’mesal makkrena aganaha, "Ma’nok na’a jagital jatengrak, te’gisim anggal so’o, angni nokcheli roangpaebone." Makkre roangna ku’rachakataha. Sal manchia sokon, makkke ma’nok do’mesali nokchei re’angaha. Do’mesal ma’nok makkreko kusi ong’e rimchakoaha.
Do’mesal gimal sokbaana mi cha’angchina ine mi song’aha. Mi minamo bijak song’na ine sam’diko chiko rue chaanataha. Do’mesal sam’dik rikingo bae’a bitchi rongngi chi’ataha. Makkre uko nike aiao imanne changgipino ma’noktang re’bao ua an’tangba apsanko dake on’gen ine chancehiaha.
Makkre do’chiko namen tonikbeaha, ua cha’man ringmanahaoan an’tang nokona robachina agane re’angipaha. Sal sokahaon do’mesal makkreni nokona re’baaha. Makkre do’mesalna mesal song’manahaon me’diko chiko rue ding’ataha. Chi ding’ahoan me’dik rikingo asonge bitchi chi onat man’jae ben gimikko asongaota, ki’sangsa chi ding’ao asongbeka gita dake ki’sang gimik chibilotkaha. Indakesa makkreni ki’sang gitchaka. Do’mesal aro makkreko mande gita aganirakate , mandeni bewalo done seaha aro skidapanikoba on’a.
Chanchibewaljiga gipinni dakako nike dakpana nangja. Indake dakgipakon ‘jola matjol’ine agana.

Pringsao me’chik bi’sa chi ko’na kang’kareo basing de’e chibimaona re’angaha. Ua chiona ong’onange chi ko’mitgo mangsa gorial chabae uni ja’gitoko chikkaapeaha. Da’nang me’chik bi’sa rang’san chirike grapaha. Demechikini chirike grapako knae ma’gipa bakan chabae nioa, demechinki ja’gitoko gorialni chikkaepngakosa nikaeha. Ma’gipa duk ong’bee gapae gorialko mol’mole aganaha. Anga ia demechik saksakamkamna agre darangba dongpaja. Ua angko dakkachapenga; anga segri. Pilabak angko nirok sandipiga dongpaja. Na’a ka’sakchapae angni demechikko watpabo. "Gorial an’tangba segri me’chikni duk ong’bee grapako nike mikchi ong’chakpilaha, indiba watajha.
Duk man’gipana mikchi ong’pile mesokgenoba, dakechakaniko on’na man’gnigipa ong’eba uko on’jaode mamung namgni ong’ja. Indaka kamkon gorial mikchi ong’a ine agana.